माल्दिभ्सलाई जित्दै सारा नेपालीलाई खुशी दिन चाहन्छौं: बालगोपाल

२०७५ भदौ २७ गते ८:५७ मा प्रकाशित

२७ भदौ, ढाका । साफ च्याम्पियनसिप फुटबलको सेमिफाइनलमा नेपालले आज बंगलादेशको राजधानी ढाकास्थित बंगबन्धु राष्ट्रिय रंगशालामा माल्दिभ्ससँग प्रतिस्पर्धा गर्दैछ ।

माल्दिभ्सलाई पराजित गर्दै नेपाल पहिलो पटक २५ वर्षे साफ च्याम्पियनसिप फुटबलको इतिहासमा फाइनलमा पुग्ने लक्ष्यमा छ तर सेमिफाइनल पार गर्नु नेपालको लागि त्यति सजिलो भने छैन । माल्दिभ्ससँग विगतको नतिजालाई हेर्ने हो भने नेपाल निकै पछि छ । तर पछिल्लो समयको नतिजा हेर्ने हो भने नेपालले माल्दिभ्सलाई पराजित गर्दै आएको छ ।

माल्दिभ्सविरुद्ध नेपालको तयारी कस्तो छ ? के माल्दिभ्सलाई नेपालले पराजित गर्दै ऐतिहासिक उपलब्धि हासिल गर्न सक्छ ? सेमिफाइनल खेलमा माल्दिभ्सविरुद्ध मैदानमा उत्रिदा नेपालको रणनीति के हुनेछ ? यही विषयमा नेपालका मुख्य प्रशिक्षक बालगोपाल महर्जनसँग अनलाइनखबरकर्मी सरोज तामाङ गरेको छोटो कुराकानी :

माल्दिभ्सविरुद्ध नेपालको जितको आधार चाहिँ के के हुन् ?

माल्दिभ्ससँग जित्ने आधार भनेको समूह चरणको ३ वटा खेल खेल्यौं त्यो पनि राम्रो भयो । दिनानुदिन हामीले सुधार गरिरहेका छौं । सबै खेलाडीले शतप्रतिसत खेलिरहेका छन् । अर्कोतर्फ मसँग भएको बेन्च खेलाडीले सबैले राम्रो गरिरहेका छन् । भोलिको दिनमा पनि मैले दिएको निर्देशन र रणनीति त्यहि निरन्तरता हुन्छ ।

भोलिको सेमिफाइनल बंगबन्धु गोल्डकप र १२ औं साग गेम्सको भन्दा पनि भिन्नै छ । ता की यो साफ च्याम्पियनसिपमा हामी लगातार तेस्रो पटक माल्दिभ्सलाई हराएर फाइनलमा पुग्ने लक्ष्यमा रहेका छौं ।

जहाँसम्म लाग्छ उनीहरूको डिफेन्स लाईन तोड्नका लागि हाम्रा खेलाडी सफल हुनेछन् । भारतविरुद्धको पनि हेर्‍यौ, वान-टु खेलेर हुन्छ की कसरी हुन्छ हामी आक्रामक खेल्ने शैलीमा छौं ।

माल्दिभ्सविरुद्ध खेल्ने हाम्रो रणनीति चाहिँ के हुनेछ ?

रणनीति भनेको अव अवस्था अनुसार हुन्छ । आक्रामक पनि खेल्नुपर्ने हुन्छ । रक्षात्मक खेल्नु पनि गर्ने हुन्छ । अस्ति बंगलादेशसँग खेल्दा मेरो प्लान ए, बी र सी थियो । त्यो अनुसार पनि हामी जान सक्छौं ।

साफ च्याम्पियनसिपमा माल्दिभ्ससँग विगतमा हामी हारेको मात्रै छौं, खेलाडीहरूमा चाहिँ दबाव कत्तिको छ ?

विगत ८-१० वर्षअगाडिको भन्दा पनि २ वर्षअगाडि हामीले कति जित्यौं त्यसमा भर पर्नुहोस् । पहिलेको नतिजाभन्दा पनि २ वर्षअघि देखि माल्दिभ्ससँग हाम्रो नतिजा कस्तो छ त्यसलाई ध्यान दिए राम्रो हुन्छ जस्तो लाग्छ ।

मेरो लगानी, मेरो टिम, मेरो खेलाडी सबैको ध्यान माल्दिभ्सलाई पराजित गर्नु छ । सारा नेपालीलाई खुशी दिलाउनु छ । नेपालले अहिलेसम्म राख्न नसकेको नतिजा दिलाउनु छ ।

भनेपछि माल्दिभ्ससँगको खेल हाम्रो लागि ऐतिहासिक हुनेछ ?

अवस्य पनि नेपालको लागि ऐतिहासिक हुनेछ । र, हामी त्यो इतिहास कायम गर्ने छौं ।

नेपालको लागि ऐतिहासिक खेलमा समर्थकलाई के भन्न चाहनुहुन्छ ?

समर्थक, परिवार र मिडिया भनेको नभई नहुने यन्त्र जस्तै हो । अहिले जति पनि हामीलाई साथ र सहयोग गर्नु भएको छ । ढाकामा जति पनि नेपाली उपस्थित भएर टिमको हौसला र साथ दिनुभएको छ सबैलाई धन्यवाद छ । आगामी दिनमा पनि यस्तै साथ र सहयोगको अपेक्षा गर्दछु ।

यो पनि पढ्नुहोस्

माल्दिभ्ससँग भिड्दै नेपाल, दोहोरिएला २ वर्षअघिको नतिजा ?

२७ भदौ, ढाका । साफ च्याम्पियनसिप फुटबलको सेमिफाइनलमा नेपालले आज माल्दिभ्ससँग प्रतिस्पर्धा गर्दैछ । करिब २ वर्षअघि यही मैदानमा माल्दिभ्सलाई पराजित गरेको नेपाल आजको खेलमा अर्को इतिहास कोर्ने लक्ष्यमा छ ।

बंगलादेशको राजधानी ढाकास्थित बंगबन्धु राष्ट्रिय रंगशालामा नेपाली टिम र खेलाडीको लागि घरेलु मैदान जस्तै हो । यो रंगशालामा नेपालले आफ्नो फुटबलको इतिहास कोेरेको छ । ढाकामा जारी साफ च्याम्पियनसिप फुटबलको सेमिफाइनलमा नेपाल फेरी अर्को इतिहास नजिक छ ।

साफ च्याम्पियनसिप फुटबलको करिब २५ वर्षे इतिहासमा नेपाल फाइनलसम्म पुग्न सकेको छैन । यो पटक माल्दिभ्सलाई पराजित गर्दै सेमिफाइनलमा पुग्ने लक्ष्य बनाएको छ । तुलनात्मक रुपमा यो प्रतियोगितामा बलियो देखिएको नेपालले के ऐतिहासिक छलाङ मार्न सक्ला ? सबै फुटबलप्रेमीमा कौतुहलता बढ्न थालेको छ ।

त्यसो त, प्रशिक्षक र नेपाली खेलाडीले पनि माल्दिभ्सलाई पराजित गर्दै फाइनल पुग्ने दाबी गर्दै आएका छन् ।

सेमिफाइनलमा ४–१ ले पराजित

सन् २०१६ बंगबन्धु राष्ट्रिय रंगशालामा सम्पन्न बंगबन्धु गोल्ड कपको सेमिफाइनल खेल । नेपाल समूह ए को उपविजेता माल्दिभ्स समूह वि को विजेता । जनावरी १९ तारिख साँझ ५ बजे भएको खेलमा नेपालले माल्दिभ्सलाई ४–१ गोलको अपत्यारीलो जित निकाल्दै फाइनल प्रवेश गरेको थियो ।

युवा खेलाडीले भरिभराउ टिममा नेपालले गोलको वर्षा नै गर्‍याे । नवयुग श्रेष्ठले ह्याट्रिक गोल गर्दै नेपाललाई नयाँ युगतिर लगे । त्यस्तै, विशाल राईले एक गोल थपे ।

खेलअवधिभर नेपालले उत्कृष्ट प्रदर्शन गर्दै माल्दिभ्सलाई पराजित मात्रै गरेन फाइनलमा बहराइनलाई ३–० गोलले पराजित गर्दै नेपालले बंगबन्धु गोल्डकपको उपाधि उचाल्न सफल भयो ।

करिब २ वर्षपछि नेपाल र माल्दिभ्स यही मैदानमा सेमिफाइनल खेल मै प्रतिस्पर्धा गर्न लागेको छ । पक्कैपनि माल्दिभ्सलाई २०१६ बंगबन्धु गोल्डकपको झझल्को हुनुपर्छ ।

जारी साफ च्याम्पियनसिपमा नेपाल समूह ए को विजेता बन्दै सेमिफाइनलमा प्रवेश गरेको हो भने माल्दिभ्स समूह बी को उपविजेता हो । नेपालले पहिलो खेलमा पाकिस्तानसँग २–१ गोलअन्तरले पराजित भएपनि दोस्रो खेलमा भुटानलाई ४–० र अन्तिम खेलमा आयोजक बंगलादेशलाई २–० गोलअन्तरले पराजित गरेको थियो ।

यता, माल्दिभ्सले भने आफ्नो पहिलो खेलमा श्रीलंकासँग गोलरहित बराबरी खेलेको थियो भने आफ्नो दोस्रो खेलमा भारतसँग २–० गोलको हार ब्यहोरेको थियो ।

माल्दिभ्स भाग्यमानी सावित हुदै टसबाट श्रीलंकालाई पछि पार्दै सेमिफाइनल पुगेको टिम हो ।

Source: Onlinekhabar.com

Leave a Reply

Your email address will not be published. Required fields are marked *